華置新商場THEONE據講係劉鳴煒「考牌」之作，上年民主黨喺商場內酒樓搞黨慶，惹來馬草泥任亮憲踩場，劉鳴煒親自應付示威者，可見佢好緊張個場。
劉鳴煒受訪時話，當日已設置示威區，初時好和平，佢都以為天下太平散場，點知馬草泥帶隊想衝上位於13樓嘅酒樓，佢即時同其他保安員兵分多路攔截，最終俾佢喺10樓成功截住馬草泥，佢笑言因為跑得比佢快。講起呢單嘢，劉鳴煒以interesting形容過程，話令到保安員更熟悉THEONE走火通道，又暴露設備、工具不足。
80後呢啲衝擊行為，身為80後嘅劉鳴煒認為不能以偏概全，因為佢認為好多80後都唔係咁，華置亦請好多80後，不論高分、低分，甚至零分嘅人都請，最緊要係要投入工作，工作態度正面，「80後唔係咁差。」大劉用人亦係不拘一格嘅，啱用嘅，咪叫佢返公司幫手囉。