隨住政府再批出三個數碼聲音廣播牌照，電台主持人突然變得好搶手。由大班鄭經翰搞嘅香港數碼電台，頭6年預計投資6.2億港元，有七條頻道，11月就啟播，佢家密鑼緊鼓籌備中，仲周圍挖角，搵明星開咪，噚日佢接受電話訪問時聲大大話自己個台粒粒星。
梁繼璋籌備節目
大班話：「我哋嗰班係明星，係電台明星，唔係娛樂明星。我哋開台係細水長流，明星唔會做得長，又未必適合開咪。電台明星請咗好多，冇開咪已經講咗，人哋開緊咪嗰啲又唔講得，所以冇乜好講。」
喺港台服務多年、曾主持港台高收聽率節目《瘋Show快活人》嘅梁繼璋已經返緊工，據知佢嘅拍檔梁思浩同貴花田，仲有林旭華同另一港台王牌主持麥潤壽等都會加盟大班旗下。梁繼璋接受電話訪問時話：「咁佢（鄭經翰）個牌都批咗，家係幫手籌備工作，我對幕後工作好有興趣，11月都會開咪做節目，又會做吓培訓DJ人才，自己乜都想試吓，會全力參與。」