自從電訊盈科（008）09年嘅中期報告披露，主席李澤楷借1000萬美金畀董事總經理艾維朗後，電盈嘅年報變得非常有可讀性。噚日，電盈2010年度年報出爐，唔見艾維朗問老闆借錢，兼且薪金津貼冇加到，仍維持1875萬銀，但就收成1245萬花紅，總薪酬達3261萬，若果1年365日開足工，平均日賺近9萬。
小小超連續5年不支薪
點解花紅高成咁？電盈發言人話，董事嘅薪金，係薪酬委員會依足企業管治程序檢討，而檢討嘅參考準則就包括董事嗰年有幾多嘢做，同埋工作性質、有乜貢獻等。簡單嚟講，公司老闆覺得「值」囉！
至於小小超李澤楷，就自06年以嚟，第5年唔攞任何薪津花紅，不過咁，電盈中期及末期股息合共派15.3仙，以小小超持股27.09%計，全年收息都超過3億，幾千萬年薪，濕碎！