英超周一場獨腳戲，由兩間由亞洲人擁有嘅球會交鋒；曼城有中東油王射住，布力般嘅印度班主就賣凍雞起家，油王對雞王，作客嘅曼城就憑身價2,700萬鎊（約3.5億港元）嘅迪斯高一箭定江山，作客1:0贏咗布力般流浪。布力般嘅印度班主又會唔會後悔請護級專家艾拿迪斯食無情雞呢？
曼城前4歐聯席位穩
有阿布扎比油王蒙蘇支持，曼城呢兩季買人都唔使本，今仗就算有泰維斯因傷缺陣，一樣只放3億幾身價嘅波斯尼亞國腳迪斯高喺後備席，好彩佢72分鐘入替，3分鐘後即刻有貨交，近門射入幫曼城取得今季第7場英超作客勝仗，亦係自己首個英超入球；迪斯高賽後仲拉埋車路士前鋒費蘭度托利斯嚟講：「費托上周都入波啦，對我哋嚟講都係新開始。」
曼城全取3分仍排第4位，比第5位嘅熱刺多4分，來季參加歐聯（ChampionsLeague）機會都好高，領隊文仙尼都鬆一口氣；相反輸波嘅布力般，係就係有機會玩「Champions」，不過係可能參加英冠（Championship）咋。不經不覺布力般已經10場冇贏過波，只係比尾三韋根多1分（未計周二戰果），隨時搞到降班，來季要角逐英冠。
錯請大儍食凍無情雞
布力般搞到今時今日，同印度班主拉奧兄弟唔識貨有關。拉奧兄弟擁有嘅雲基集團，靠凍雞同禽畜用藥致富，上年11月更入主布力般，想以娛樂性足球吸引觀眾；就嫌原有領隊「大儍」艾拿迪斯踢法沉悶，炒咗呢位護級專家，搵助教卻恩頂上。結果球隊戰績江河日下，由最高第8位跌至宜家第16，如果下季真係降班，拉奧兄弟就算場場請觀眾食雞，都唔慌高入座率。
