羅樂林近日喺24小時內播映嘅五套無綫劇集中連死五次而成為新聞人物，就連歐美多國都有報道，佢嘅人氣即刻十級跳，連帶羅樂林孻女羅苡之嘅感情亦受關注。苡之08年同趙世曾個仔趙式浩分手，原來舊年同香港先生陳志健做舞台劇《鴨仔嘜》而撻着，拍拖近一年。
大晒煙韌相
陳志健係06年香港先生健力組冠軍，同黃長發同屆，以前做模特兒兼健身教練嘅佢，06年加盟無綫後發展平平，但佢身形健碩，份人又細心，難怪深得苡之歡心。其實陳志健同未來岳父羅樂林不時喺無綫劇中合作，早排播完嘅《女拳》同近排嘅《點解阿Sir係阿Sir》，佢兩個都有份演出。陳志健亦不時出席女友嘅家庭聚會，馮仁昭喺佢facebook見到佢同羅苡之嘅拍拖煙韌相，可見佢哋感情相當穩定。
噚日馮仁昭問羅樂林對囡囡同陳志健拍拖點睇？佢笑住話：「最緊要個女開心。」咁對未來女婿又有乜評價？羅樂林話：「OK，冇乜嘢呀，係個女揀嘅，呢個年代唔到我講，其他嘢我唔會理o架啦！」
