東涌朱綺華婆婆司法覆核勝訴，嗌停未做妥環評報告嘅港珠澳大橋，呢隻鑊環保署孭硬走唔甩，不過特區政府死撐，出動左報打手、喉舌傳媒連日批評，試圖卸責轉移視線。部份香港傳媒是非不分，內地傳媒反而like爆，定性呢次維權成功，係香港核心價值——法治嘅勝利，內地網民更視朱婆婆為偶像，係「史上最強悍市民」！
「法制比大橋更重要」
高院上星期就呢單case宣判時，法律界、工程界都好留意，事後同八方傾到單案嘅前因後果、如何補鑊時，有人話內地好多傳媒都有大篇幅報道同評論，share全國，內容可堪細味。八方搵到唔少料，好似上海《東方早報》指出，香港傳媒形容大橋被「逼停」不恰當，因為以司法監察行政天公地道，大橋停工「是一次為正義的駐留」。
《南方都市報》認為按照法律做好各種評估，可以防止勞民傷財嘅「政績工程」，又話如果內地「真要與香港接軌，法制其實要比大橋更重要」。內地網民仲捧朱婆婆為「史上最強悍市民」，竟能嗌停數百億元工程，《海峽都市報》則指其實唔係婆婆強悍，而係香港有獨立司法制度，「世間沒有天生的公民英雄，如果法治給力，一個孱弱的老太太也可以成為英雄。這是這起事件給出的最大啟示」。
《新聞晚報》形容朱婆婆贏官司，令港珠澳大橋更傳奇，又讚佢唔係以極端方式來維權，所以唔需要視佢為英雄，因為案件證明只要司法機關真正把關，就可以對一啲有問題重大工程說不，唔需要勞民傷財。
應該為朱婆婆喝采
上海金融與法律研究院研究員傅蔚岡喺《新聞晨報》發表文章，指法庭裁定環評有問題，只要作出補救，日後可以減少涉及環境破壞嘅訴訟，因此即使建造成本多半成都值得，唔好入朱婆婆數，「這筆5%的損失，應該記在香港環保署的賬上」。
內地傳媒對香港特區政府亦唔客氣。中央電視台網站有篇評論文章，表示應該為朱婆婆「喝采」，認為如果司法覆核可以換來政府更加科學、詳細嘅環保評估：「將工程的環境代價和對居民的影響降到最低，又何嘗不是一項功德無量之舉？」
mailto:[email protected]