申訴專員黎年向僭建村屋「開刀」，演變成新界人向政府「開拖」，早前仲喺鄉議局大會成立行動小組，話有需要時圍政府。身為小組揸fit人嘅十八鄉鄉事委員會主席梁福元係局內鷹派人物，噚日再次警告，唔排除發動村民遊行表達不滿。
梁福元噚日話，新界丁屋僭建物係歷史遺留問題，喺殖民地時代獲新界條例豁免，有乜理由特區一回歸，保障冇晒？佢建議政府修例，容許經工程師評估過屬安全後，業權擁有人補交費用，現有額外建築物就免受清拆。作為局內鴿派嘅鄉議局主席發叔噚日唔肯評論呢個建議。政府已經被批評偏袒新界原居民利益，八方好想睇吓政府今次點接招。