敏妮07年底跟光頭仔喺大概每盎斯850美金買入嘅紙黃金，至今一直未放，擺咗超過3年，斗零息都冇收過，認真唔化算。好在復活節假期前，黃金終於升破每盎斯1500美金關口，賬面賺76%。先旨聲明，只係買咗好小量，所以賺極有限，但總算唔使蝕。
由於揸黃金冇息，所以其實唔合乎經濟效益。不過敏妮相信，喺portfolio入面，點都要有啲黃金，所以一直未有沽出。
低買高沽有難度
講到成本效益，中國人就最識計數。70、80年代股市瘋狂，香港人乜都炒一餐，家陣大陸就正喺呢個年代，投機者對風險視若無睹。敏妮睇到一則內地新聞，話大陸人居然勇到碌卡炒金。
據報道話，黃金價格一路升，所以有投機者去金舖買金，然後碌卡找數，博黃金會喺大概50日嘅信用卡免息還款期大幅飆升，跟手就可以沽金套現清還卡數，達到無本生利。
齋聽的確幾大風險，因為金價冇錯係一直升，仲隔冇耐又話創新高，但能唔能夠咁好彩，吼到位低買高沽呢？好大機會吼唔中。敏妮唔係鼓吹「富貴險中求」，所有投資都有風險，睇你點管理。
就以碌卡買金為例，唔理你用嚟炒定買嚟保值、佩戴，就同去shopping買嘢冇分別，碌卡只係唔想帶咁多現金出街，並唔係唔夠錢又要買先揀碌卡。碌卡炒金同炒孖展分別係，借孖展炒股，隻股未必可以長揸，萬一隻股一跌不起，同時蝕息蝕價。至於碌卡炒金，只要夠本錢找卡數，喺家嚟講，長揸翻身機會仍然大。
溫敏妮
http://wanmanli.com/blogs/