八方噚晚去咗個好特別嘅派對──係一個告別派對，一個告別一整條新界村落嘅派對！如果有睇開新聞，一定估到八方講緊嘅係石崗菜園村啦。港鐵持續半年喺菜園村又拉又鎖，浮腰、告人乜都做齊，最近終於肯做番件「人性化」嘅事，在菜園新村選址起啲組合屋暫時安置村民。村民亦相當合作，計劃日內搬走，噚晚喺菜園村搞咗場惜別宴，宴請幾年來出過力撐菜園嘅各方好友，齊齊告別菜園，重建新村。
美孚小業主取經
惜別宴場面墟冚，超過300人到場，有人仲連趕兩場，下午去完抗議唐唐或者反核示威，再趕入菜園，相當畀面。公民黨吳靄儀、黎廣德；公民起動何秀蘭都有現身。千禧後至出世嘅「中椒童」Joseph同媽媽高太亦入村支持村民，逾20位美孚小業主就順便向村民取經，交流吓點樣抗爭。
菜園村有好多廚神，惜別派對當然有好嘢食。村民每家每戶都整番幾味拿手好餸，村長珍嘅「清明仔」、禮叔嘅炆豬肉同芝麻糕、高婆婆嘅炆鴨，食到班80後停唔到口。食物擺滿村口嘅行人路，今次冇人挑戰有冇熟食牌，不過有後生仔食到興起，問咗句：「咁多人食嘢，究竟邊個洗碗呢？」真係考起大家。
村民掛咗幅好大嘅「珍重」橫額，大家一人一句感謝各界一直瞓身支持，由苦行、圍立法會、組織巡守隊護村，一路走來力撐菜園。晚上7點半，大家又齊集村口大屋揮手影大合照；大約兩年前，喺同一位置，大家一齊舉個蕉葉立誓保菜園。過咗今晚，村民就開始要搬去新村，離開呢塊生活咗半個世紀嘅土地。菜園珍重！新村再見！
mailto:[email protected]
40盆植物搵人認養
惜別宴上，有得食有得拎。菜園村村民被迫搬走，但種開嘅花花草草好難一齊帶埋走，為咗等佢哋都有個歸宿，村民集合咗近40盆植物，畀嚟告別菜園村嘅朋友認養，好似明哥就捐咗幾棵龍骨出嚟，另外仲有蘭花、蘆薈，連龍眼樹仔都有。
棵棵植物都掛住張紙仔，寫住「我來自××（村民名字）的家」，同埋「菜園開枝，社區散葉」，寓意希望菜園村保衞家園、守護社區嘅精神，可以延續落去。除咗植物，村民又印製咗啲明信片，一面係菜園村嘅相，另一面印住抬頭送畀運房局局長鄭汝樺同「回家真好」嘅字句。不過唔少村民喺明信片上寫下自己嘅心聲，以及多謝撐菜園村各方好友嘅字句，好warm。
臨時屋後日可入伙
港鐵家喺菜園新村嘅公共耕地，起緊十幾間臨時組合屋，遷入新村嘅村民最快會喺4月27號開始陸續搬入去住。八方噚日去新村睇過，有啲工人喺度趕工；現場所見，啲屋每間兩層，一間共400呎，每層兩房一廳，有廚房同廁所，可想而知都幾逼狹吓。
村民住開嘅村屋好多都過千呎，家名副其實大屋搬細屋。即將搬去臨時屋住嘅游伯話，喺菜園村住咗53年，真係好唔捨得，最唔捨得嘅係呢度嘅歷史同回憶。今年佢73歲，即係20歲做仔嘅時候已經喺度住，一下子要搬，心情可想而知。
