入境處早排換班，陳國基接替白韞六做入境處「一哥」，上年剛由駐京辦調返香港嘅曾國衛亦升做助理處長，成為現時入境處最年輕嘅助理處長，更被視為下任一哥嘅熱門人選。
原來曾Sir當年差啲做咗記者，86年中大新聞系畢業嘅佢同八方講，讀書時要做系內刊物，已經覺得做記者好辛苦，「又要採訪，又要編版，做得好辛苦，被嚇怕」。比較鍾意紀律部隊工作嘅佢決定轉軚，畢業後唔去跑新聞，改去考入境處。
曾Sir話，點知入境處工作都一樣辛苦，但佢就做得開心，好似喺駐京辦嗰時，可以加深了解國情，又幫過唔少求助港人；又好似汶川大地震、香港義工團喺內蒙發生嚴重交通意外等，呢啲工作經驗都令佢獲益不淺喎。
曾Sir家都有間唔中同部份中大書友敍舊，好似高曾Sir一屆嘅師兄——《星島日報》總編輯蕭世和，《頭條日報》助理總編輯劉國業同《AM730》社長盧國麟亦係佢同學。