今年首季，邊位富豪最「人氣」，睇吓網上邊個俾人search得最多就知。Google搜尋榜由以往半年公佈一次，改咗每季公佈。
華華率先攞到份富豪名單，公諸同好。首季最多人搜尋嘅富豪名字呼之欲出，就係「分燊家」事件「最佳男主角」賭王何鴻燊。由佢喺三房大宅「讀稿」，到之後播出佢同代表律師嘅英文對話內容，劇情比拍戲更加曲折，網民當追劇集，谷起賭王人氣。
陳光標人氣繼續旺
排第二就係小小超李澤楷，上榜原因相信係佢同梁洛施宣佈分手，港女、宅女仲有希望，自然力捧。至於第三位嘅「中國首善」陳光標，今年走咗去台灣派錢，當時揚言派5億新台幣，咁豪，當然吸引人起佢底。不過，華華相信「首善」人氣應該可以繼續，事關近日內地傳媒報道，佢少捐多報，受捐機構不存在等，陳光標以「港式」口脗回應，「人在做，天在看，會將慈善進行到底！」
十大名單仲有組財團入主TVB（511）嘅台灣富豪王永慶個女王雪紅，同埋喺日本地震後捐100億日圓嘅日本首富孫正義。
2011年首季富豪搜尋榜
第1名 何鴻燊
第2名 李澤楷
第3名 陳光標
第4名 陳國強
第5名 陳振聰
第6名 田北辰
第7名 王雪紅
第8名 孫正義
第9名 許晉亨
第10名 鄭裕彤