升級安全鼠　體貼入微

日本輻射污染、2012末日預言無日無之，擾人心神，亂人意志，點先可以避世一唞忘卻煩憂？趁機借來安全舒適程度更上一層樓的凌志RX270長測數天，去到杳無人煙的欣澳海邊，吸一啖新鮮空氣，過一個悠閒下午，有時想靜心清神，方法就是如此簡單。

記者：許維雅
攝影：伍慶泉
Model：Eagle

車高有利上壆避車

■面對無敵大海景，釣魚絕對係放鬆心情的最佳玩意。

既有霸氣外形，又有舒適自在的操控，凌志RX車系的SUV向來討人歡心，舊年加推了一款新細偈版本RX270，以更新豪華配備、價又更低的吸引力，招攬房車車主轉投SUV懷抱。早前借來長測數日，二話不說走到朋友介紹的小蠔灣海邊遊車河，由於進入小路前經過一個地盤工地入口的小壆，房車怕會「刮底」，車身夠高的RX270就Fit晒無問題！
進入海邊的海旁小路偏窄，有機會遇對頭車，RX270車高視線遠的優點就方便我更容易望清遠處，搵定地方避車。加上避車時有前後泊車警示器輔助，中央螢幕更會立刻彈出圖片顯示危險位置，感覺更清晰，操控更安心。

■有天窗又有頂架，爬上車頂望無敵大海景仲好feel。

■後座平地台，又可校低椅背，坐後座仲舒服。

配備提升滑鼠助安全

RX270推出時的最大賣點，就係設於中央、可360度操控多功能屏幕的RemoteTouch，試駕那幾日，刻意多用呢隻滑鼠仔感受實用程度，睇吓會唔會虛有其表，點知發覺真係幾好用，輸入導航地址、打電話都更直接方便。值得一讚的，係每當行車時，系統會自動凍結某些設定或輸入，以免駕駛者分心，逼我經常要把握停燈位的時間打電話。
其次要讚就係可於前方擋風玻璃睇車速的多功能投射顯示屏，最抵錫係連導航方向及音響資料都會一併顯示，轉左轉向望前面就得，同樣係既實用又增安全性的新配備，好多歐系豪房都無佢咁貼心。曾經訪問過股壇名人莊友堅，佢批評過平治ML後座唔可以校低唔夠舒適，RX270唔止後座可校低些少，空間感又超充足，做後座乘客仲爽。惟獨2.7公升引擎的油耗一般都要12L/100km，多高速時最低試過10.2L，可能有RX450h比較，感覺唔算經濟。