馮仁昭四圍超:樂瞳人氣升繼續做慳妹 - 馮仁昭

馮仁昭四圍超:樂瞳人氣升繼續做慳妹 - 馮仁昭

無綫新劇《點解阿Sir係阿Sir》播咗一個星期,最先彈起受網民注目嘅唔係主角陳豪或者楊怡,反而係連對白都冇嘅大茄蔡嘉寶(Akina)同飾演K4成員嘅樂瞳,其中樂瞳唔單止撼低糖妹榮登高登女神,佢喺tvb.com人氣榜更加揮低一班小生花旦排第一,認真巴閉。
原來樂瞳同糖妹一樣慳家,平時出入主要係搭公共交通工具,前日佢出席完九龍灣嘅活動,去咗附近一幢工業大廈做嘢,到下晝約五點離開。之後樂瞳一支公行去九龍灣港鐵站,搭港鐵返天后屋企,其間有唔少男仔眼望望,但佢冇理會,只係邊搭車邊㩒電話消磨時間。

樂瞳喺天后站出閘時,一路講住電話。

獲支持感開心

其實樂瞳喺《點》劇嘅角色成日蝦蝦霸霸,都幾乞人憎,噚日馮仁昭同佢傾開電話,佢話初初都擔心俾人鬧:「諗住會有好多惡意批評,甚至成為少女公敵,估唔到出嚟個反應係咁,仲有好多女仔fans支持,好意外,可能啲人覺得我着校服個樣OK啦!有咁多人支持好開心!」

樂瞳(右)前日同張秀文(左)等喺九龍灣出席完活動,齊齊搭無綫嘅小巴去港鐵站。