一隻Game可以出到第三集，總有理由！最新一集《戰鼓啪打碰3》（PATAPON3），以加入RPG元素為賣點，有職業類型仲有得強化武器防具，歸類為「音樂節奏動作角色扮演遊戲」，聽個名咁長，都知佢勁勁哋，同時令人驚驚哋！
文：阿洛
中英合版 故事明晒
聽見RPG真係縮一縮，皆因我淨係識得睇幾粒漢字，估估吓嘅劇情，有幾史詩式？有幾咁熱血？都未必知！好彩今次行貨玩中英文合版，故事主線講乜，一轉Channel即刻清楚晒！
故事講以「世界盡頭」為目的地嘅「啪打碰」，幾經辛苦終於去到「受詛咒大地」，仲無意間解除巨大箱子裏頭嘅邪惡封印；而玩家需要扮演神明大人，化身為「啪打碰」，和同伴一同對抗阻擋喺前方嘅七名黑暗英雄同惡靈。聽個故事幾咁似正統RPG！而且宣傳片嘅宣傳句：「勇者們，覺醒吧！」、「一同拯救世界吧！」都令人好熱血！
大量RPG元素
今次標榜增加故事劇情要素，即係想大家玩得投入啲咁解，而且唔只故事，仲好似RPG一樣要利用唔同嘅職業、技能、裝備，創造出獨特自我嘅英雄角色。
另外亦可以透過強化武器、防具，製作出有個性嘅裝備，升吓呢咁先引到人煲機嘛；而且今次嘅遊玩內容更聲稱比上集多四倍以上，無論係新手或老手都能夠樂在其中。
對戰組隊吹兩嘴
又講番轉頭，芒亨點解會咁紅？因為有得連線合作嘛。所以要成為受歡迎嘅手提機遊戲，連線已經係必然功能，呢隻《PATAPON3》就對應AdHoc、Infrastructure模式，最多可以8人齊齊玩，而且都知你哋表演慾強又鍾意團結精神，所以更有系列首次登場嘅對戰同組隊機能，加埋聊天功能，鍾意唔鍾意都好，都可以出句聲囉！
Patapon3
主機：PSP
類型：音樂節奏動作角色扮演遊戲
製作廠商：SCE
發售日期：2011-04-28
人數：1-8人