趁着一連幾天復活節假期，單仁相約一班商會中人飯局，把酒暢飲之餘也趁機收收風。單仁早已料到一提最低工資，這班大佬一定「扯晒火」，大罵勞工及福利局局長張建宗太偏心，豈料這趟飯局卻發現，香港僱主聯合會總裁龐維仁已成為商會最新批鬥對象，指明若非龐維仁「懶醒」登廣告，商界也不會面對飯鐘錢的壓力，大嘆身為僱聯主席的叻仔陳祖澤，怎麼不教後輩兩招？
酒後吐真言，有商會中人飲多兩杯向單仁大爆談判小秘密。其實政府與勞資雙方商討最低工資的時候，各方並非沒有留意飯鐘錢及休息日有薪問題，真相是大家都覺得：「28蚊都唔係容易搞，試吓實行半年先，睇定啲先再講其他問題啦。」結果是各方「暗啞抵」認同飯鐘錢及休息日有薪問題暫時隻眼開隻眼閉，無謂節外生枝。
望陳祖澤教精龐維仁
據知勞顧會一眾委員都知道這套潛規則，僱主聯合會亦有代表在勞顧會，理應知道這個不能公開的「玩法」，所以當僱主聯合會突然高調地登廣告指明飯鐘錢及休息日問題必須解決時，不少商會中人睇到「眼凸凸」：「喂，呢個龐維仁搞乜呀？知唔知做緊乜呀？」如果不是僱主會高調賣廣告，其實張建宗未必會說出若不付飯鐘錢就儼如無良僱主等挑釁性說話。有商會中人氣冲冲踢爆政府：「嗰日政府一打嚟就話，聽日會宣佈外判工休息日有薪呀，咁樣仲唔係施壓，傾都未傾過就改變個遊戲規則。」
無辦法，弱勢政府難有bargainingpower，「所以佢哋俾工會鬧兩鬧就話做囉，都冇諗過後果」。但該商界中人始終認定，若不是龐維仁出招，提醒飯鐘錢及休息日有薪問題懸而未決，工會未必在眾目睽睽下又要「為民請命」，政府更毋須被迫走上末路，一班商會大佬寄望陳祖澤「教精」龐維仁，以免日後一錯再錯。