平治無耐前喺西班牙特內里費島，讓國際傳媒試駕最新第三代SLK，嶄新技術自然令人眼前一亮！不過貪新之餘都唔好忘舊，作為平治開篷版SL元老車款，地位一啲都唔輸蝕於新車系，現時SLK車系亦留有上世紀五十年代產物的190SL影子，睇番當年新車價高達一萬英鎊，以當年生活水平，足可以喺港島任何地段買起成幢冧巴嘅樓，絕對唔嘢小㗎！
記者：趙慧敏
攝影：譚盈傑
Model：Hidy@GMEModels
一架車買起一幢樓
一萬英鎊可以做啲乜，聽老一輩講，五十年代用兩萬蚊可以喺銅鑼灣隨便揀個靚舖，一萬英鎊成個地段冧巴買起都得，成幢大廈換架超跑，諗起今時今日一架超跑索價真係唔算貴！知道當年擁有一架超跑是何等奢侈之事，但作為經典跑車，就算經幾十年時間洗禮，魅力一樣不減。今次搵來這架雖不是「土生」，但肯定是「土長」的190SL，可以陪我哋喺大帽山跑一轉呢！
咄咄逼人火氣十足
相約車主在山腳等，就是要睇其跑山英姿，車主出發前講明唔好開咁快，免得老爺車「氣喘」，單純的我信到足，真係慢駛行車，不過老爺車絕不老爺，亦步亦趨且引擎聲清晰響亮，深深感受到其火氣十足，相信與車主悉心保養有絕大關係。
不如講番歷史，190SL早在1954年紐約車展中首度亮相，震撼車壇，當時更被形容是平治最漂亮的開篷車。老實講，它並非以性能掛帥，配備1.9公升直四引擎，最大馬力只有105匹，相比起外形相若的300SL，明顯輸一截，但依然無損其吸引力，加上其生產期只由1955年5月至1963年2月，產量有限，難怪至今已晉身年過半百老爺車，身價一樣近百萬元。
一字牌簿保養得宜
眼前車身油漆及電鍍都十分新淨，難道一直是收藏品，絕少行街？車主解釋，車輛現時仍是一字牌簿，該車於1958年生產，第一時間來港，當然車主屬非富則貴之輩，直至舊車主於十多年前轉讓，所以該車現時仍是一字牌簿，前後五十多年，只經歷兩手車主，自然十分矜貴。不過除保養得宜外，新車主為保留原汁原味，亦為他下了不少工夫，例如鬼面罩前的三芒星、裙腳等都經過翻新，另外特別從德國訂回部份配件如電鍍泥擋，最新搞作是重新更換軟篷，令其外表更省鏡。
M.Benz190SL
引擎：1897cc直四
馬力：105ps/5,700rpm
扭力：142Nm/3,200rpm
傳動：4速手波
收藏價：$600,000-$1,000,000（視質素而定）