彩色少女
余一心（藝術工作者）
「遊行前用乳膠漆溝水髹咗白色，代表中共嘅白色恐怖。之後髹彩色塑膠彩，令白色消失，畀大家感到藝術應該係開心，談論到政治，都可以好喜悅。」
李家皓攝
白色恐怖蟲
程展緯（藝術工作者）
「呢個造型好似蝸牛，代表白色恐怖慢慢咁過嚟，譬如重案組調查塗鴉藝術家，港鐵抽廣告威脅傳媒唔可以講佢哋壞話。當然，中國嘅白色恐怖仲厲害。」
被白色恐怖拖住的狗
王先生 （視覺藝術課程畢業生）
「黑色嘅好似一隻狗，用條白色鎖鏈拖住，代表白色恐怖，會用嚟跪拜『自由戰士』。第一次拎藝術品遊行，因為呢次關乎自由表達問題，藝術界應該參加。」
滑板河蟹
阿喜（藝術愛好者）
「噚晚先開始做，加咗車轆，擺喺地踩住行，大家可以聯想到打橫行。好似呢次中央政府用一貫作風對付艾未未，已經去到等同向國際宣戰階段。」
巨型草泥馬
黃先生（藝術工作者）
「我同朋友用咗三日時間做咗呢隻動物；草泥馬代表一種不滿政府打壓言論嘅象徵，今日行出嚟都係想國家同社會多啲藝術表達自由。」
釋放艾味
魂遊（藝術工作者）
「呢啲係中醫用嘅艾煙，燒着佢，啲煙飄入空氣，你已經捉唔到佢，代表我哋要爭取釋放艾未未。作為藝術家最關心係言論自由同創作自由，我哋要爭取。」
赤膊紅人
阿謙（藝術工作者）
「艾未未只係表達自己意見，如果咁都可以被拉或者失蹤，我覺得冇唔可以接受嘅事，所以今日用呢個方法表達希望釋放艾未未嘅聲音。」
謝榮耀攝
