香港新能源（987）潔能業務今年全面反映，PE吸引，同時PB亦大平賣，抵搞。新能源上年8月底，完成向阿媽收購祖國潔能發電項目，而2010年度（12月結）集團就大幅虧轉盈賺3.37億銀。雖則盈利主要係嚟自負商譽收益（潔能項目資產公平值高過集團收購成本價）3.86億銀，但亦反映出阿媽對新能源嘅眷顧。又新能源2011年度，嚟自聯營新項目嘅4個月溢利已經有2175萬銀，到咗本年度全面反映，聯營溢利應該可以上到6500萬銀。加埋其他主要潔能項目起動，核心業務溢利上扣1億銀，冇問題，預期PE得6倍。再講，新能源PB得0.5倍，又係平通街。博新能源見1字頭，現價（0.72元）回報率40%，目標價PE仲係低企單位數。
新時代背景厚博升20%
新時代能源（166）最新每股NAV0.4元，現價（0.181元）折讓達到55%，石油股當中，呢個折讓算係吸引。又新時代大股東之一，係新世界系大孖沙彤叔，家陣揸住新時代8.68億股，超過10%權益，股東實力雄厚唔在講，新時代中線可塑性亦相當高。呢轉短打，博新時代升20%到0.22元，集團未有耐上到NAV水位。
錢雋