元朗六條鄉嘅鄉事委員會今屆改選大執位，原屏山鄉委會主席鄧胤楚冇連任，結果佢嘅元朗區議會副主席一職都要重選。由於呢個位向來都係由鄉紳擔任，蕭規曹隨由鄉事派冧莊好正常，之但係由邊位人接任就比較令人頭痕，事關元朗向來猛人雲集，人人都想上位，八方聽聞至少有三位鄉委會主席有興趣角逐。
為免兄弟傷和氣，據聞有人提議抽生死籤，由年年向車公求籤嘅鄉議局主席發叔出手最公平，亦有人覺得呢種撞彩式抽籤方法唔好，有意角逐嘅十八鄉鄉委會主席梁福元表明唔贊成，指如果協調不果，應該投票定勝負。八方聽聞區議會內其他派系都唔想介入鄉事角力，鄉下事鄉下人自己解決，外人過問有害無益。