福臨門點心加價，腸粉要七十元一碟，食唔起嘅，請勿進來。小YY好鍾意食福臨門嘅馬拉糕，但一定要有人請先至敢去，知道福臨門點心加價至六七十蚊一份之後，嘆一句：「怕冇人請我去嗰度飲茶咯。」心癮啫，食吓學校學生飯堂嘅點心啦。
一九七八年有一首hit歌，就係許冠傑嘅「加價熱潮」，雖然已面世三十三年，今日仍然應景：「你怕我怕個個怕，煙加酒加屋租加，巴士加的士加，多士芝士乜都加……糖又加，鹽又加，成日咁加任佢話……買佢怕！要加就加，總之慣啦！」如果左丁山係DJ，呢輪會日日播呢首歌。
加加加，弊在稿費冇得加，十年照舊總之麻木嘞。呢日老總S打電話嚟，八吓有乜話題，左丁山對佢講：「加價啦，十二年來賣六蚊一張，加啲啦！」其實係心諗，你唔加報紙零售價、加廣告價，稿費點會加呀？老總S話：「係應該加價嘅，報紙每噸由以前四百幾美元一噸，升到依家七百美元呀！」直情係啦，仲唔加？老總S話：「有免費報紙派吖嘛！」
唉，咁又係，免費報紙通街係，在中環街頭，周時有人派英文報、財經報、消費雜誌、廣告雜誌等等，好似唔駛成本咁。收費報紙加價嘅話，銷量更受影響，在免費報紙與網上閱報夾擊下，報紙加價確實有困難。但係加加加加，糧油又加，蠔油又加，燃油又加，只有報紙唔加得價？與老總S講完電話，八卦吓，打幾個電話周圍問，探聽到報行係幾想加兩蚊，每份報紙要賣八蚊，如果係咁話，即係加價三成三，咦，一般記者/編輯知道教科書加價三至五巴仙就話「狂加」，如果自己報紙售價加三成有多，會唔會在報紙寫條標題：「報紙瘋狂加價三成賺到盡」，副題就係：「議員狂轟報紙無良」咁呢？想落都幾好笑。
問過一個記者，點解寫標題會寫成咁，記者笑笑口話：「我哋係車衣女工啫，隨手就寫，夠快吖嘛。」唔，寫稿當作流水作業，可以唔經大腦，無怪王于漸會遭殃。一條標題：「知名經濟學者02年倡停建居屋，王于漸掃樓帳面賺9000萬」，當日冇新聞乎？王教授唔通今年犯太歲？