薛家燕噚日到數碼港出席「兒童成長嘉年華」，佢話睇到莫少聰喺內地涉吸毒被捕段片感到好心痛，佢唔明點解要為咗埋堆同應酬而吸毒。家燕姐覺得乜嘢行業都有壓力，絕對唔應該吸毒減壓，佢話：「我會食嘢同唱歌減壓，我成日都同啲仔女講唔可以吸毒。」佢又話以前聽過有啲前輩吸毒，但強調呢一代嘅電視藝人冇呢啲壞習慣，最多都係食煙仔啫。