愛情生活Dry爆
馮仁昭四圍超：舒淇搵女助手陪快閃掃貨 - 馮仁昭

現年35歲嘅舒淇感情仲未有着落，雖然身邊出現好多男士好似台灣同鄉張震咁，但都係似是而非嘅緋聞。近年台灣剩女一個個結婚，好似林熙蕾最近喺馬爾代夫嫁埋，令舒淇更顯得形單隻影，舒淇前日去中環買嘢，喺短短半個鐘連掃兩大名店，但同佢出雙入對嘅都只係助手。
前日下晝4點幾，戴住花帽同茶色太陽鏡素顏現身嘅舒淇，同女助手去到中環一間金舖，相信舒淇一早揀好一條金手鏈，店員見到佢入去就自動包好手鏈，連找數畀錢前後都唔使10分鐘。

微博公告行蹤

之後助手同舒淇去到對面嘅Coach旗艦店，今次舒淇都係有備而戰。佢哋一入舖頭就上2樓，店員唔使5分鐘已經包好個手袋，舒淇由到埗至行出店門前後都只係7分鐘左右，跟舒淇搵男友速度形成強烈對比。
見舒淇一出門口就講電話，但好快就發現記者蹤影，跟住佢以極速跳上七人車離開，仲快嘅係佢俾記者影到相唔夠一個鐘，佢就喺微博同人講俾狗仔隊影咗相。