日本大地震導致核事故，連累日式食肆門庭冷落。多年來香港人去日本旅行消費貢獻當地經濟，家陣香港日式食肆奄奄一息，日本人好有義氣援手，八方知道有日本廣告公司派人來港打救日食。該公司一行六人日前來港一個禮拜，總共訪問咗近40間由日本人經營，或者由日籍廚師主理嘅日式食肆。監製安本一史同八方講，其公司地震後想搞一個「加油日本人」網站為同胞打氣，於是搵喺國外生活日本人講啲鼓勵說話，加上知道國外日式食肆生意大受打擊，就諗咗呢個方式，呼籲日本人趁4月底開始嘅「黃金周」到港旅遊多幫襯日式食肆。佢哋個網站本月27日推出，呢個香港日食特輯同日上網。各地日式食肆生計與日本出口商關係唇齒相依，救亡本地日食，日本出口商都要講「多磨」。