電戲道：甄子丹文鬥曹操

現年47歲的甄子丹，過去20年醉心當武打明星，熱衷在鏡頭前晒拳腳功夫，08年參演電影《葉問》，在戲中大耍詠春，動作矯捷，真功夫讓他獲捧為宇宙最強。無敵始終最寂寞，子丹拍膩了打戲，他希望用演技贏得大家的掌聲和喝采，去年首度拍攝賀歲片《最強囍事》，為觀眾送笑彈，最近則再作嘗試接拍導演麥兆輝和莊文強的古裝片《關雲長》，扮演傳奇人物關羽，跟演曹操的姜文大鬥演技，子丹說：「呢次同姜文用把口過招。」
撰文：比華利、張俊銘
《關雲長》上映日期：4月28日

甄子丹透露，最初獲麥兆輝和莊文強斟介在電影《關雲長》演關公一角，他非常抗拒：「我對三國唔係咁認識，而且關公一向畀人印象係臉紅、有幾呎長鬚，身高成丈，即九呎，我咁嘅身形點去演？說服力唔夠，我唯一適合係同關公武性、斬將抗敵脗合，我仲同莊文強講笑話咁高嘅人物，佢應該搵姚明最啱，但佢解釋話以前啲人講嘅一丈，其實只有五呎，所以真係曾志偉演都啱，反覆傾談後，我就接受咗呢個挑戰。」子丹說早於05年演徐克執導的電影《七劍》時，徐克就慧眼識英雄，讚子丹適合演關公這個歷史人物，料不到多年後，他終於在大銀幕化身關公。

壓力大晚晚失眠

落實接演關公，子丹內心仍存忐忑，因戲份偏重文戲，他說：「上年係我一個轉捩點，畀咗自己好大野心，突破咗好多演技潛能，我要挑戰自己打戲以外嘅演技，雖然拍《關》片到約三分二嘅時候，我仍然好似唔知自己演乜嘢，要每日都問導演我做成點，又要增肥演出，全身裝備重60磅，全部都有難度，但我既然接受呢個挑戰就要做到最好，精神壓力大到自己受唔到，晚晚失眠，好彩意志力戰勝一切。」

甄子丹近年在演技和處世上完全開竅，鏡頭前舉手投足都充滿自信。
攝影：陳順禎

打星出身的甄子丹有意轉型當演技派，給觀眾另一番新鮮感。
攝影：葉君海

激情戲點到即止

就算最難一環，用普通話念對白，子丹都克服過來，令要求甚高的導演莊文強都收貨。子丹還要跟影帝級人馬姜文過招，子丹說：「姜文嘅戲真係頂尖，佢係北京人，演繹古裝文縐縐嘅普通話對白揮灑自如，莊文強對對白好嚴謹，一粒字都唔准改，文法語氣對我嚟講好難，呢次我真係同姜文用把口過招，畀我好大壓力。好彩拍咗一半我就適應咗，同姜文演戲時，話之佢係『宇宙最勁戲』，大家都代入角色，好快起咗化學作用。」
除了姜文，子丹與內地女星孫儷在《關》片都有不少對手戲，二人繼《畫皮》後再結片緣，默契不少，孫儷演劉備小妾，是關公初戀情人，子丹與孫儷在戲中有感情戲，麥兆輝大爆這對初戀情人有激情戲，子丹卻篤爆說：「唔會太激情，我家唔需要用呢啲戲賣弄，況且我家有家庭，係人哋老公同爸爸，要顧及家人感受，盡量唔會接呢類戲份。」
近年成為內地票房靈丹妙藥的子丹，對於有指《關》片預計在內地可收過四億票房，卻不敢恭維：「票房好難強求，唔敢講自己係乜嘢票房靈丹，只不過近年真係好運，每部戲都必定做好本份。」
髮型：KelvinKooofHair
化妝：OmixB