36F雷凱欣女神（雷神）雖然近日在《3D肉蒲團之極樂寶鑑》中，因露點變老點而受盡千夫所指，但幸好有新男友呵番。雷神前日偕拍拖僅個多星期的新歡出巡蒲旺角斷正，雖然貌似少年哲古華拉的新歡既非型男亦非有米闊少，但卻勝在有氣又有力。前日他與雷神拍拖行蹤敗露後於停車場大暴走，沿車路由地下跑上三樓也面不改容，如此好體力，又難怪令雷神嗒糖。
近日憑《3D肉蒲團之極樂寶鑑》榮登千萬票房女星的雷凱欣，事業愛情兩得意。一直因為工作無暇拍拖的她，原來個多星期前跟貌似少年古巴革命家哲古華拉新歡撻着，前日她偕新男友拍拖遊旺角，便被記者撞到正一正。
長氣男友跑斜路
前日下午5時許，戴上大眼仔的雷神狀甚風騷的步出深水埗福榮街唐樓寓所，然後極速登上新男友駕駛的逾百萬寶馬房車出巡。雷神男友戴cap帽及穿BedwinandTheHeartbreakers日本潮T襯牛仔褲，雖然樣貌極度普通，但卻深得雷神歡心，他將座駕停泊在旺角一停車場後，便搭住雷神膊頭往先達中心，其間二人又十指緊扣，表現認真甜蜜。雷神與男友踩上一友人於先達開設的手機用品店hea足兩粒鐘後，便偕該男友人三人行地有講有笑離開，往停車場取車。
記者上前問雷神男友有否欣賞過女友主演的《肉蒲團》，其男友即時怕醜到面紅耳熱兼頭耷耷。再問可覺得女友片中露的是真胸，以及是否跟平日所見一樣時，雷神男友依然不發一言，之後他為避記者而由斜路一口氣撐上三樓，沿途未見他跑到氣喘，如此好體力，難怪令雷神嗒糖。
怕嚇親雙方家長
問雷神拍三級片有否被男友責怪時，她得意地說：「冇喎，之前已經知道我要拍。因為我哋識咗好多年，但我哋啱啱開始，你哋就發現咗！」原來前日雷神男友駕駛的逾百萬寶馬是同行男友人所有，之後男友人取回座駕並護送雷神及其男友離開。
記者昨日致電雷凱欣時，她直認蜜運說：「係《3D肉蒲團》首映之後先開始拍拖，係朋友啲朋友，之前我拍戲嘅時唔想分心，真係冇拍拖，但家拍完，又面對好多壓力，男朋友好支持同撐我，我哋真係啱啱開始。」
雷神指《肉蒲團》首映夜男友也有入場欣賞，她說：「佢同啲朋友睇完，仲話最後俾個故事感動咗。不過拍咗拖之後，男友希望我工作時盡量唔好太性感。」雷神火速戀上新歡，雙親知情卻未見過未來女婿，前日出巡旺角卻讓戀情曝光，她說：「我都擔心男朋友啲屋企人見到報道先知，怕佢哋唔接受。」雷神表示會與男友商量提早見家長。
問到男友身份時，雷神說：「佢係一個普通人，打工仔，做貿易生意，鍾意一個人係唔使解釋，大家一齊開心就好，我呢排面對好多難關，佢好細心聽我傾訴，幫我減壓，我唔渴望識乜嘢富二代。」採訪、攝影：
黃曉程、張俊銘、朱志聰、比華利
明星竇：高登女神住高登
高登討論區是捧紅許多宅男女神的地方，而有兩位女神真的住在深水埗高登商場附近。近日因《3D肉蒲團》被質疑假露點而被高登仔插爆的雷凱欣，被本報拍得拖仔出巡旺角，原來她家住深水埗。另一位女神糖妹早前亦被本報發現居所就在深水埗高登商場附近，平時回家也是坐港鐵。
