上海直擊三之三$2,000萬健力士黑魂　未蒲頭已賣走

上海直擊三之三
$2,000萬健力士黑魂　未蒲頭已賣走

地上最強嘅Bugatti準備喺亞洲大展拳腳，第一站當然是中國市場，今屆上海車展更首度展出馬力達1,200匹嘅VeyronSuperSport，最巴閉係車價未計稅已達2,000萬港元，一樣火速被人買走。

記者、攝影：畢煩

1,200匹刷新紀錄

正所謂世事無絕對，只有真情趣！原以為架BugattiVeyronGrandSport突破一千匹，已經贏晒一眾市售超跑，點知車廠自己破自己紀錄，Veyron再度升呢推出SuperSport，馬力達到恐怖嘅1,200匹，431km/h極速亦已打入健力士紀錄！雖剛到訪過法國總壇Molsheim，但跟SuperSport緣慳一面，今次居然在上海車展遇到，仲係全黑碳纖車身，連鬼面罩、胎軨、門柄及入氣口都係極神秘嘅黑色，徹頭徹尾嘅黑魂超跑。入場人士想見佢真係要講緣份，事關發佈會後，SuperSport瞬即運回展館VIP房，讓「意向買家」慢慢欣賞。咁矜貴，除身價達180萬歐元（未連稅約港幣2,046萬），亦屬中國唯一一部，當然早已名車有主啦！

■大部份超跑品牌均集中喺N5館，Bugatti齋以Veyron已吸引大量入場人士，擠得水洩不通。

■由於名車有主，未能坐進車廂，從窗外側望，雙色內櫳及碳纖裝飾，比GrandSport朱紅內櫳別具味道。

■SuperSport雖安躺在VIP房中，但其霸氣仍然濃烈得令人窒息。

■同場仲有特別版GrandSport，白上身配藍下身，同屬限量發售。

熱辣新車大堆頭
保時捷Panamera最強版本TurboS

屬全球首發，馬力達550匹，比Turbo版足足多出50匹。

顯赫積架XKR-S

憑着5.0LV8引擎首次打進300km/h級別，內外同樣辛辣中顯氣派，車價達251.8萬人民幣。

賽車級GranTurismoMCStradale

結合賽車版GT4元素，擁有450匹馬力，成為最強瑪莎拉蒂，預計車價達288萬人民幣。

又型又勁RangeRoverEvoque

展出五門揭背版及Coupe版，仲玩Prestige及Dynamic唔同主題設計，要型要勁悉隨尊便。

林寶最新大牛AventadorLP700-4

繼上月於日內瓦車展亮相，再火速運至上海車展發佈，巨大鳥翼車門仍吸引不少途人目光。