蝌蚪樂器、魚骨豎琴，唔識得明和電機的人都頭：「咩嚟o架？」好吧，小記承認做訪問前自己也以為明和電機只是一間日本公司，及後才被明和電機的瘋狂兼奇怪意念吸引，更想即時買入Otamatone加埋下載iPhoneapps齊齊jam歌，仲有，下星期二明和電機將會殺到香港開只此一場live音樂會，記得帶埋私伙樂器到場同土佐社長大合奏。
記者：關璇
「公司」簡介：
1961年由土佐阪一所創立的明和電機有限公司主要生產真空管，全盛時期員工超過100人，1979年受石油危機影響而倒閉。直至1993年，土佐阪一兩個兒子土佐正道與土佐信道，以綜合藝術與商品的創作模式，再度創立明和電機，分別擔任總經理與副總經理的職位。
「公司」成立宗旨是「不可為之，但又何妨」，更開發出大量創意作品，當中有無厘頭商品「魚器（Naki）」系列；原創電動樂器「Tsukuba」系列等。最近推出的Otamatone蝌蚪系列更人氣非常，於YouTube吸引到超過30萬人次點擊，吸引不少fans學習彈奏。
土佐：明和電機社長土佐信道
蘋果：蘋果日報
獨家無厘頭樂器
蘋果：點解你會有創作這些獨特樂器的想法？
土佐：一開始只係因為好奇地諗：如果將敲擊樂器同埋由電腦程式控制的音樂放在一起，會唔會有得意的效果？慢慢就發展到現在想將動物的聲音加到樂器當中。即是想將動物的聲音透過機械表現出來，而非只局限於電子音樂。我已經創造了一個發出狗仔吠聲的機器、一個好似人咁笑的機器同埋一個好似人咁唱歌的機器。
蘋果：你發明這些樂器的原則係咩？
土佐：機械同埋無厘頭（nonsense）。其實一直以來我當這些樂器係用來搵答案的工具，我想知道到底「人類是甚麼？我是甚麼？這個世界是甚麼？」
蘋果：有答案了嗎？
土佐：未，到目前為止我仍未搵到這些問題的答案，我估我呢世人都唔會搵到。不過，最緊要的，是我一直用緊我的創造力去尋找答案。
蘋果：最初時，要令大家明白你的新穎表演，有困難嗎？
土佐：無難度，大家都會好享受我的演出。最困難的，反而係當我無表演無樂器在手時。
芝娃娃變小蝌蚪
蘋果：你係點樣搵到靈感創造Otamatoneo架？
土佐：Otamatone的靈感來自於03年時我發明的一個名為「ChihuahuaWhistle」的唱歌機械人。
蘋果：點解你的樂器大都係以動物的形式出現？
土佐：日本人相信世上所有東西都有靈魂，我諗呢個亦可以解釋，點解日本有咁多公仔角色出現。當我創作的時候，我亦都感覺到物件中有某種「生命」的存在，這就是我的產品以動物形狀為主的原因。
蘋果：創作這些「無厘頭」樂器時，有無遇過咩困難？
土佐：當我發現創作出來的成品，不如我想像的好時，的確有點困擾。
蘋果：你覺得自己是商人定係藝術家？
土佐：這個問題很有趣。藝術家唔賣自己的作品也無法生活吧。
蘋果：音樂對你來講有何意義？
土佐：當然是維持生命所必需的能量。
蘋果：今次來香港開演唱會，你會帶些甚麼驚喜來呢？
土佐：當然今次我會介紹一些新樂器畀大家，特別是那些以「聲音」為主的樂器，相信一定會好有趣。希望今次音樂會的無厘頭machines可以給香港人的大腦按按摩減減壓，可以令大家心情興奮就好啦！
蘋果：明和電機未來會有甚麼計劃或目標嗎？
土佐：到香港搞「分公司」！
明和電機經典產品：
明和電機VoiceMechanics音樂會
日期：4月26日8pm
地點：九龍灣國際展貿中心3樓匯星
門票：$438、$338、$238、$180
查詢： http://www.hkticketing.com