午餐時份，中貿林帶來一位稀客，就係曾在商界擔任高職嘅牧師L，賓架P最識講嘢，人人開心，一見到牧師L就話：「啱啱好，餸菜到，請牧師先祈禱多謝上主賜飯。」左丁山以為佢開玩笑啫，點知牧師L立即低頭祈禱，點講法，左丁山並非教徒，唔記得咁多咯，總之大意係多謝基督賜飯，不敢或忘。令左丁山想起朱子治家格言：「一粥一飯，當思來處不易，半絲半縷，恒念物力維艱……自奉必須儉約……飲食約而精，園蔬愈珍饈……」吃飯時，即刻不敢多留廚餘。
牧師L以前常在大陸做生意，現在則多往大陸旅遊，對深圳尤其熟悉，佢話買電子產品，深圳華強路勝過鴨寮街多多聲，產品之多、之便宜、之高科技，可以嚇親矽谷專家，但人地恐怕亦會因此而妒忌猜疑，中國人對產權究竟有無觀念。
答案梗係冇啦。牧師L話佢上次到華強路，就有店員向佢兜售一個小小鎖匙扣，放在枱面，就可以秘密錄音談話兩小時，想話捉人痛腳或做狗仔隊偷聽，話咁易，用來影相一樣得，牧師L乃是正經人，聽見就唔敢買。左丁山以小人之心度之，牧師L去大陸見教友講道之時，會唔會有人陀住一個華強路鎖匙扣呀？
牧師L話內地對基督教並不算控制得太嚴，大概基督教有好多教派，難以統一，不似天主教只有梵蒂岡，係一股大勢力，令中國有顧忌。其實講到底，中國所怕者，並非甚麼教義、教派，而係有一個有羣體之組織，有力量發動羣眾嘅組織，在中國，只能容許一個共產黨有組織與發動羣眾嘅能力，其他無論個人或社團一概不准，一定打壓，趙連海、艾未未、維權人士皆屬此類，引伸落去，內地上fb並不容易，理由就係好簡單，喺fb搞串連，太容易了。
飯未吃完，賓架P收到短訊，要佢趕去山光道馬會，於是佢立即離座而去。忙起上嚟，中午要趕兩枱飯，都唔知食乜嘢好，最終亦係食銀紙啫。福臨門嘅點心已加價到六十元、七十元一碟，好在福記嘅客人一定唔會反對嘅。