李亞男前晚到尖沙嘴宣傳「2011香港小姐競選」，由於近年港姐質素慘不忍睹，去年港姐更被形容為豬扒盛會，為吸引智慧與美貌並重的新血參選港姐，李亞男奉旨擺男友王祖藍上枱，更揚言現時靚女不參加選美，所以會考慮硬銷祖藍現年22歲、就讀社工系的胞妹參選。
無綫每年舉辦香港小姐競選，但港姐質素每下愈況，去年港姐競選劣評如潮，就連CNN都以「豬扒盛會」來報道，上屆冠軍陳庭欣被封為豬扒港姐，認真慘情。為免大家質疑港姐質素，無綫近日積極宣傳港姐，並安排歷屆港姐走訪港九新界。前晚李亞男、楊思琦、張慧雯和陳庭欣等一班港姐及華姐，到尖沙嘴作招募。
「要減肥先」
現年26歲的05年國際華裔小姐冠軍李亞男為宣傳港姐，奉旨擺男友王祖藍上枱，她自言現時靚女不會參加選美，所以會推薦祖藍現年22歲、正就讀社工系的胞妹參選，李亞男說：「睇吓佢有冇興趣，但參加都要減肥先。」
祖藍妹妹與哥哥十足餅印，兩人外表似足九成，假若祖藍妹參選，相信必順利入圍，因為她除了似足祖藍外，她與林峯胞妹林蔚殷如失散的孿生姊妹，加上祖藍因外貌似足黃光亮，更有傳兩人是父子關係，加埋祖藍妹入這個餅印大家庭的話，那真是「一家團聚」。
李亞男也笑言祖藍兄妹十分相似，她笑說：「如果佢減咗肥就會好似祖藍咁美麗，咁就可以參加。」至於會否擔心祖藍妹在高度上比較輸蝕，李亞男覺得現時無綫的花旦不需要太高，而且祖藍妹讀社工系，所以十分有愛心。
採訪：卓寶花
攝影：陳志嵐
