建築師蔣匡文從風水角度，反對拆建中區政府合署西翼，佢有冇講錯，左丁山唔識，他日有緣與紫微楊碰頭，會向佢請教，如果見到蔣匡文師弟葉漢良，亦會問吓。
風水、擇日呢回事，可信則有，不信則無。好似以前曾問過肥佬黎：「喂，佐丹奴咁多新舖，租舖前有冇睇過風水或者開張時，擇番個吉日吉時？」肥佬黎話：「擇你個頭，我要交租o架，租金好貴，我地收舖之後，就以最快時間裝修，裝修完畢，清潔乾淨，就要立即開舖營業，點會得閒到擇吉日。如果通勝吉日係在一個星期之後，唔通我要納空租一個禮拜？你儍o架。開舖頭，一年三百六十五日，日日都係吉日！」
西方有句俗話，不要與成功爭拗，佐丹奴當年如此成功，點可以同肥佬黎講睇風水，擇吉日吉時吖。至於佢在其他方面睇風水，非吾所知也。特區揸弗人曾特首係天主教徒（肥佬黎亦然），佢會唔會叫人睇完風水先至決定拆唔拆政府合署西翼呢？記者們不妨密切留意，爆到出嚟，必定轟動。
潮流興講保育，保育成本好高，用一筆不是小數目嘅公帑將舊「古物」維修還是易事，以後嘅營運成本先至係細水長流，主辦機構好難頂。例如上環西港城，至今仍是失敗之作，連累市建局，他日中環街市相信亦會搞到市建局猛咁蝕水，呢個街市早已內傷，修葺費十分龐大，市建局揀咗四間建築師公司提交設計大綱，各擅勝場，但冇講到成本噃，一定唔係小數目啦。無論他日採取邊一個設計，看來難以自負盈虧方式去營運，市建局搵定錢去墊底可也。
保留「古物」而有錢賺嘅，一定要私人承辦。尖沙嘴前水警總部改建完成後，左丁山嫌佢唔就腳，只去過一次，就係去年馬會在此搞一個國際賽前晚會，左丁山去到，嘩，第一個感覺就係好有氣氛，酒店內廣場夠晒古樸，在酒店外廊望落嚟甚有氣勢，離開之時，要行得好慢，因為有無數咁多本地與外地遊客在此拍照，影夜景。前幾個星期，惡佬明家人第一次去，反應就係好鬼靚，遊客熱點，好受羣眾歡迎，當初呢件「古物」，如果交畀市建局活化，恐怕到今日仍然「黑蚊蚊」。