惠康超市公關一姐趙敏，原來早前結束同超市14年關係，轉去做漢堡包，兩個月前跳槽老麥做副總裁，噚日公開亮相，宣佈老麥全線加價。
雖然係高層，趙敏話入職後都要去最前線實習，學炸薯條同整包。以前做超市相信佢唔會落手落腳執貨上架，入咗老麥卻要打真軍，佢話前線訓練好有挑戰性，要跟足每個程序、步驟去製作食物，整巨無霸要記住一層層落餡料，佢笑言自己都搞到亂晒龍。
金鐘海富中心老麥係全球人流最多分店之一，運作好似戰場咁緊張，趙敏話要達到最多90秒出一份餐嘅標準，稍為慢手慢腳都唔掂。
超市幾乎壟斷，快餐業競爭大好多，呢份工睇嚟冇咁易做。