怕了一個藝術家，怕了一朵茉莉花，究竟這是一個甚麼盛世？八方近日發現有少數人佩戴一個銀色心口針，細心睇清楚，心口針原來係一朵花，造工好細緻，花瓣紋理、葉脈都做得好仔細，好奇一問，原來呢個係茉莉花襟針（左圖）。八方追問佩戴呢個茉莉花心口針嘅人，喺邊度買到咁精緻設計，點知佢話係非賣品，有錢都買唔到；至於心口針來歷，佢就守口如瓶。呢個世界好難有真正秘密，八方打聽之下，終於知道多少少呢個茉莉花心口針嘅由來。
據了解呢個茉莉花心口針係純銀製造，全球限量打造50個，每個造價約$1,000；心口針尾部係一粒紅星，據說係象徵中國，寓意茉莉花始終有一日可以在中國遍地開花，即使現時大陸官方聞茉莉花色變，但既然北非可以有茉莉花革命，中東多國亦有新氣象，無理由中國唔會有茉莉花革命嘅一日！
幫忙送畀艾母高瑛
以八方了解，呢個茉莉花心口針可以話係小圈子信物，民主黨有少數人獲贈，八方老闆肥佬黎原來都有一個。對於心口針來歷佢不置可否，只係話近期日日佩戴，早前為《飲食男女》拍廣告時，都有戴住茉莉花心口針上鏡。
有人偶然見到呢個心口針，愛不釋手，表示願意幫忙送一個畀身在北京嘅艾未未母親高瑛，為佢打氣。艾未未失去音訊後，高瑛心急如焚，批評當權者無人性，要求盡快交代艾未未下落，「活要見人死要見屍」，好堅決咁話：「我站在兒子身後，決不動搖。我上到斷頭台也要喊：我的兒子最優秀，最棒！我支持他！」
兒子好似人間蒸發，做母親嘅擔心憂慮可想而知，八方難以想像一個自稱強國嘅國家，點解可以咁樣對待一個平民，無理拉人仲要屈人，呢個究竟係一個乜嘢世界？今日旺角有撐艾未未遊行，塗鴉少女會站出來，其實唔使佢呼籲，大家都應該出嚟撐艾未未。
mailto:[email protected]