曼聯禮拜二晚喺英超失分俾紐卡素，如果阿仙奴之後喺禮拜三，能夠喺對熱刺場北倫敦打吡戰贏波，雙方嘅距離就會拉近至4分。點知阿仙奴又發波瘟，領先兩球下竟被逼和3:3，追唔近紅魔之餘，仲俾車仔搶埋個2哥位，如果最後搞到連前3名都入唔到，完全係自己攞嚟衰。
阿仙奴前一場聯賽喺補時輸番球12碼，結果慘被利物浦逼和1:1，咁樣唔見咗兩分，完全係球證嘅問題，但前晚喺熱刺嘅白鹿徑球場又失兩分，班球員絕對責無旁貸。佢哋踢到41分鐘就領先3:1，我求大俠都以為呢3分應該袋硬，點知喺完半場前被追成2:3，再喺71分鐘輸球12碼，俾熱刺三兩下手腳就追成3:3；若果唔係佢哋龍門施捷斯尼之後救咗幾球必入波，可能反輸3:4，分分鐘連1分都保唔住。
雲格：戰鬥到底
阿仙奴咁樣失分，白白錯失咗追近曼聯（禮拜二作客打和紐記0:0）嘅機會，繼續維持6分差距。講真，如果佢哋贏到熱刺，同紅魔嘅距離就會縮至得番4分，之後嘅英超就會好緊張刺激，家陣就同之前一樣，繼續由曼聯領放。
阿仙奴領隊雲格就死撐爭標未絕望：「我哋會戰鬥到底。未計熱刺場波，我哋喺聯賽連續15場不敗，冇邊間球會可以做到。」不過，唔輸有乜用，阿仙奴喺對上16場聯賽8勝8和，若可以贏多幾場，早就過咗曼聯啦！
至於賽前排第3位嘅車仔就冇令人失望，憑馬隆達梅開二度，輕鬆以3:1擊退伯明翰，對上7場聯賽6勝1和，家陣仲同阿仙奴同分，但得失球較佳而取代兵工廠嘅2哥位。賽後佢哋領隊安察洛堤牙擦咁話，佢哋仲有機會衞冕聯賽錦標。
肥安話：「我哋6分落後曼聯，要追真係唔易。我哋嘅目標，就係贏晒餘下嘅比賽。」唔係我求大俠偏心曼聯，想紅魔最後5場聯賽失6分或以上，好難囉！