已經辭咗職嘅股神畢菲特前熱門接班人索科爾（DavidSokol），前排俾人篤爆佢喺建議巴郡收購化工公司路博潤（Lubrizol）前，偷步買入Lubrizol嘅股票，唔只繼續有手尾跟，仲連累股神老人家俾人告。
原來索科爾偷步買股事件曝光後，有個叫MasonKirby嘅巴郡小股東喺星期二向特拉華州法院入稟，控告索科爾、畢菲特同埋巴郡董事會其餘董事。
巴郡、股神拒回應
MasonKirby嘅理據，係索科爾明知股神一定會聽佢支笛，最終收購Lubrizol，所以做咗春江鴨先行買入Lubrizol股份。呢啲咁不道德嘅行為，已經導致巴郡蒙受聲譽上損失。Kirby仲話，畢菲特同索科爾根本係合謀，違反股東授予佢哋嘅責任，以致索科爾受到美國證監質詢，甚至連巴郡信貸評級都可能受影響。對於今次單case，巴郡同埋畢菲特嘅發言人都冇回應。
股神一世英明，到家一把年紀先俾個小股東告，都可謂老貓燒鬚。至於索科爾，唔只接唔到股神班，仲要累公司俾人告，唔怪得有小股東同傳媒話佢累街坊。