近期被政黨、小業主連番狙擊官商勾結嘅新世界發展，前年同市區重建局合作推出尖沙嘴豪宅名鑄，呢個盤有價有市，一房單位要賣天價2,000幾萬元，連太子「純官」鄭家純同家人，都以公司名義高價掃入多伙，遭輿論質疑有冇造假托市，結果市建局急急補鑊，後來推出多項辣招，規管發展商內部認購。
原來市建局嘅辣招辣㷫好多人，發展商無不怨聲載道，猛鬧市建局玩得太盡，八方聽聞其中一個巨無霸發展商，更加踩上市建局發爛渣。呢個發展商與市建局素有合作，關係唔錯，受制於市建局辣招，卻即刻反面。
畀凳仔俾佢排隊
據講大孖沙嘅一位高層老臣子，找市建局晦氣時好鬼躁，指住市建局高層質問：「超級富豪唔可以買番自己嘅發展項目o架咩？係咪要佢哋同一般小市民排隊等攞籌？」市建局話晒係公營機構，賣樓有規有矩，排隊攞籌有乜問題先？因此有人就回應咗一句：「如果佢真係排隊買樓，最多我哋到時擔張凳仔俾佢老人家坐。」
需知道呢位老臣子為大孖沙打江山多年，江湖地位十足，俾人頂撞後扯行火谷到爆，隨即連環爆出一連串問候句兼助語詞。由於老臣子平日表現都幾和藹，上鏡評論樓市時陰聲細氣，忽然變臉形同情緒失控，真人演繹地產霸權，全場人無不側目。
唔畀內部認購
正所謂富不與官爭，即使老臣子發火都於事無補，政府去年推出9招12式打壓樓市，市建局隨即推出更辣嘅8招，雖然冇講明係要針對顛價豪宅疑似托市嘅個案，但明顯衝住發展商而來，因為市建局辣招規定旗下重建物業所有單位只作公開發售，唔可以內部認購或預留單位；首批單位只准賣畀以個人名義交易嘅買家，發展商董事局成員與高層，如果想買單位，簽臨約前要向市建局申報，簽署後24小時內須公佈所有成交單位資料等。
mailto:[email protected]