「細個返到屋企，媽咪話：『阿女，肚餓就拎瑞士卷食』。」就是因為兒時回憶，黃氏兩姊妺一年前在尖沙嘴開了一間瑞士卷專門店，賣逾20元一件的瑞士卷。
記者：陳皓怡 攝影：梁鑑章
妹妹Amy自小喜歡甜點，更喜歡下廚，「想整啲好食嘅嘢畀人食，如果佢哋覺得好食，會好有共鳴。」讀完甜點課程，她曾做過不同工作，但始終希望開一家餅店，適逢在零售界打滾多年的姊姊Ada希望轉換環境，故姊妹一起創業。
Ada說，「我好鍾意招呼人，你叫我做侍應，我好開心。」妹妹則說，「我哋係一凹一凸嘅組合，我只鍾意做甜品，所以做廚房嗰部份，姊姊喺舖面做管理、市場推廣。」
所用材料貴行家3倍
餅店出售的瑞士卷，每件逾20元，較市面數元一件貴數倍，有食評質疑「一件咁細嘅嘢，點解賣得咁貴？」兩人解釋，她們所用的材料，比一般餅店所用的貴逾3倍，「無論忌廉、綠茶粉、糖漿、生果，都用最好嘅，好似朱古力，我哋係用法國Valrhona。時間耐咗，啲人發覺我哋用咩料，點解要廿幾蚊。」
開店前，兩人考慮在傳統購物旺區尖沙嘴或銅鑼灣開舖，但心水舖難找，舖租也不便宜，「我哋都有諗過樓上舖，不過樓上舖要有牌，唔係度度做到，所以揀地舖，呢條街，街頭街尾（舖租）差幾萬蚊。」最後兩人落實在尖沙嘴加連威老道開店。
豈料簽租約後才發現，店舖電壓不能負荷製作蛋糕的設備，「嗰陣真係好擔心，如果做唔到，畀咗嗰幾個月租都唔知拎唔拎得番。」姊妹倆匆忙找解決辦法，「我哋問中電可唔可以加大個電壓，又同業主立案法團開會。好在最後業主同我哋分擔咗部份開支，只係畀多幾千蚊，當交學費。」
店舖電壓未能負荷
開業成本約90萬元，餅店比預期遲了個多月開張，「第一個月生意好差，頭兩星期，一個鐘得一、兩個客，望嘅多買嘅少。」每天要有蛋糕出爐，每天都在交租，總不能看着生意日復日蝕本，「我哋拎啲瑞士卷畀人試食，佢哋試過覺得好就會返轉頭。」開舖年多，由生意慘淡挨到今天收支平衡，兩姊妹終於鬆一口氣。不過，投資額大，暫未知何時回本。
開業成本
租金：30萬至40萬元
裝修：30萬元
入貨：20萬元
水電：8000元
投資額：約90萬元
靠乳酪填補淡季生意
開餅店是很多女孩子的夢想，Amy目標是成為造餅師傅，為實踐理想，她飛到加拿大溫哥華廚藝學校修讀了1年製餅課程。為累積經驗，她更在當地餐館工作，回港後又在一家餅店做了3年造餅師。
創業前，她做足準備工夫，獨沽一味，優點是專注做好招牌貨，但風險不輕，為降低風險，她們不斷增加產品款式，「我哋之前得瑞士卷、brownie、macaron同曲奇，呢一年加咗好多唔同款。」
開舖3個月即改菜單
此外又提供不同大小供選擇，「女士一般都想試多幾款，但又唔想肥，所以整10蚊一細件嘅餅，勝在可以試多幾款。」除了大小可供選擇，兩人定期為客人帶來新鮮感，「啲客人會問我幾時有新款，我成日都問客人鍾意乜口味，再由Amy發版睇吓可以整啲咩。」開舖後3個月就更改菜單，以瑞士卷為例，大部份款式已跟開舖時不一樣。
甜點有淡旺季，「夏天其實你食少啲甜嘢。」為填補生意額，所以推出乳酪，「原來乳酪要申請牌照，不過只要你準備充足，衞生搞得好，其實唔係太難。」現時瑞士卷佔生意額一半，三成則是乳酪。