多得TVB，一集《心有靈犀》令劉以達一洗在笑片中的怪形象。雖說戀愛令人傻癡癡，但身邊有個共患難、多年來仍愛得癡纏的達嫂，懂得愛的人，應該傻極有限吧？「家仲出碟，仲唔係傻佬？」阿達自嘲。「我老公係大智若愚！」既是夫唱婦隨，就別理他人看不穿好了。
記者:蔡慧敏
攝影:楊錦文
殭屍變灰姑娘
訪問在動植物公園進行。由中環到半山的小路崎嶇，令年屆48的阿達氣喘吁吁:「真係要做多點運動了。」他自言在98年結婚後，生活已健康了不少，由晝伏夜出的殭屍，變成12點幾便呼呼大睡的灰姑娘。「有咁好的另一半，好多壞習慣都要改。兩個人一生一世，是責任。有這種想法，就自然會變。」煙癮亦收斂了不少，由日耗3包減至1包，「不然就更窮。」雖然紅雙囍依舊煙氣逼人。阿達夫妻二人早在89年蒲disco時認識，8年後重遇才發展成戀人，此後阿達經歷了事業上的起跌，總是失意居多。自資出碟但反應欠佳，又試過整年不發市，靠親友接濟度日，但二人總是恩愛如昔。究竟阿達除了「好笑」，有何可愛之處？「佢追我時好有誠意o架！以前的男友送你回家，通常只送到樓下，但佢會送上屋企，在樓下徘徊不去……」阿達搶白說：「找到個真心的梗係唔捨得走！」難得老婆照單全收：「都真係好冧。一個冧字，仲唔夠？」其實對阿達來說，達嫂當年不啻是一道清泉。在荷東廣東的年代，挾着達明的名氣，也有過食客三千的日子，「啲人覺得明星喎，可以鑿你一筆，埋單梗係你。但佢個人就係唔貪心，又幾好傾。」就這樣，二人在家跳跳舞、扮吓Batman和Catwoman，眨眼又十幾年。
女鬼截車
阿達一向予人「飄飄欲仙」的感覺。撇除多年來不懂應酬、不會埋堆而失卻的機會，他的不通世務，最經典是拍《大內密探零零發》時扮女人，谷德昭說某日深宵收工後，他沒卸妝沒換衫便走人，肯定沒有的士肯停下吧？果然翌日他穿同一身戲服現身片場。想不到是「其實是截到車的，但我忘了帶鎖匙，在大廈管理處睡了一晚。」當時達嫂在哪？「那時我們未一齊啦……」要照顧長不大的細路，吃力乎？「他需要一個好好的管家，讓他專心做自己的專長。我是很enjoy的！」表面證供看來，口齒伶俐的達嫂是代言人，她卻說自己一輪嘴，都不及老公一語中的，令人O晒嘴。「他對世事觀察入微，人也達觀，我從他身上學到好多嘢。」其實阿達雖然有時漏口，卻反應敏捷。小記問達嫂他何時由達明的型仔變成冷面笑匠，他即時搶白：「你不如問我啦……其實在達明一派時我已經有家的風采，只是當時的形象令我收埋咗好多幽默感！」笑得開懷，皆因信主得救。「現在不用再為前景擔憂。之前經歷過咁多起跌，信主後，知道人生就是這樣，就不再回望了。」
等待大奇蹟
信了主不代表日日有工開，但阿達話「有壓力就留畀耶穌」。今年5月將再自資出碟，也如有神助。去年12月開始構思，由創作、找糖兄妹主唱其中一曲、與唱片公司傾發行，都異常順利：「好感恩。神好似download咗啲嘢畀我，每一首歌都好滿意。」《希望之旅》並不是福音唱片，而是貫徹他以往的迷幻，只是來得更爽、更直接：「以前太不羈放蕩，家『飄』得更有技巧，適可而止。」靡靡之音飄到咁上下都要着地，只是小眾口味要封蝕本門委實不易：「做碟的過程本來就有好多小奇蹟，加起來便是大奇蹟了。」
