05年黃榕和雷凱欣組成女子組合SexyDolls，相隔6年，雷凱欣搖身一變成為國際三級片女星，黃榕則繼續享受影三點式靚相，出版三點不露的寫真，黃榕堅守最後防線，拒絕接拍三級片，她說：「我老竇、阿媽話如果我拍三級片會打死我！」
黃榕和雷凱欣6年前組成SexyDolls，以性感為賣點，不過今日拍三級電影《3D肉蒲團之極樂寶鑑》露兩點的雷凱欣，當年竟曾一口拒絕公司安排的泳衣騷，黃榕說：「我記得有一次有個job係着泳衣，佢好似唔係好願意咁，佢話接受唔到囉。」
「當年泳衣都唔肯」
如今雷凱欣360度轉變，連曾經相依為命的好姊妹黃榕也接受不到，她說：「我都係睇報紙先知，好震驚呀，之前連着泳衣都唔肯，轉變好大呀，家就話露三點，真係俾佢嚇親，我都想知佢點解會咁。」眼見好姊妹雷凱欣上位，黃榕同樣希望得到更多機會，但並非要拍三級片，她說：「要拍好耐之前拍咗，我過唔到自己嗰關，可能我思想上仲未開竅，自己就接受唔到喺螢光幕咁樣全球裸露自己個身體，泳衣都仲OK囉，我要守住呢三點呀！」
質疑「唔係佢個胸」
黃榕過不到自己心理關口，還有家人大力反對，她說：「我阿爸阿媽知道雷凱欣拍三級片，即刻同我講，叫我唔准拍，佢哋話如果我拍三級片會打死我，我着泳衣佢哋都係啱啱接受到，我男朋友又成日哦我，所以我都唔明佢（雷凱欣）父母點解會支持。」
全球期盼一睹雷凱欣的FCup巨胸，連黃榕都好想睇，不過哪一幕露點卻有造假之嫌，她說：「以前一齊換衫赤裸裸未完全睇過，不過知佢好大，我都有睇《肉蒲團》，我都覺得應該唔係佢個胸，因為佢好大o架，嗰幕唔似係佢個size。我有friend打電話嚟，叫我回水，做乜叫我？又唔關我事。」
曾和陳冠希傳緋聞的黃榕，如今再提起他已無所謂，還接受他回港發展，但已不想再聯絡，她說：「大家都淡忘喇，我都淡忘，咪幾好，佢同女朋友好似連體嬰咁！」
採訪：楊潔雯 攝影：陳俊強
