買樓投資，除咗睇時機、睇位置、睇水位，原來仲有一樣嘢可以睇，就係「性價比」。
乜嘢係「性價比」？呢個詞彙喺內地好常見，就係性能/價格（capacity/price），即係喺同一價錢之下，比較邊個性能好啲，投資置業「性價比」亦用得着。
敏妮有個朋友，雖然已經好富貴，但同敏妮一樣，最有興趣就係搵錢，近年憧憬人民幣升值，佢當然唔執輸。稱得上富貴，當然唔會只係諗點返大陸做定存，賺嗰幾厘息咁奀。最近佢聽到朋友介紹某大陸樓盤，分期落成，頭嗰兩期賣完唔係好耐，二手市場已經有高價成交個案，第三期開盤，位置同質素都更好，所以佢趁weekend上去睇。
內地人愛住高層
雖然富貴朋友都有喺香港買樓投資，但佢承認對大陸樓市唔熟，全靠另一位喺大陸做生意嘅友人作盲公竹。至於扑鎚買邊個單位，富貴朋友就用「性價比」衡量。佢同地產代理講，「我budget就係得咁多，唯一條件係層樓唔可以向西，你幫我睇，用呢個價錢，最高層數可以買到邊個單位。」
同香港一樣，大陸樓都係越高層越搶手，所以高層單位一般會稍貴。結果富貴朋友買咗個筍貨，因為佢買嗰個單位樓上係頂層duplex，業主自用唔諗住沽。至於同一層其他單位業主，無一個理會地產代理。「地產代理話，係得我會聽佢哋電話，所以收到好多人問價。」據聞家陣買家嘅開價，已經比買價高咗近六成，仲未計期間人民幣升值。富貴朋友估人民幣仲有得升，既然咁多人問價，層樓唔憂賣，所以每次有客打嚟問，佢都會mark高啲叫價。
溫敏妮
http://wanmanli.com/blogs/