入廚討厭事之一，煎燶鑊，洗時怕刮花唔敢大力擦，逼住浸一晚水，先洗得甩。原來有幾個方法可以輕鬆去鑊燶，唔怕整花隻靚鑊啦！
方法一：烚菠蘿皮
將菠蘿皮加水煮約20分鐘，原來菠蘿這種酸性食物，有助將鑊與已炭化食物分離，燶焦會軟化並浮上面，連洗潔精都慳番。
方法二：煮紅酒
將平日飲剩的紅酒倒入鑊，完全浸過燶嘅位置，開大火煮滾後轉細火煲15-20分鐘，燶焦同樣會軟化，好易就可清除。
方法三：煲洋葱
用洋葱都得，同樣加水浸過面，滾起後烚15-20分鐘，鑊燶好易起得甩，一洗就乾淨晒。
