錢國偉以前幫無綫製作節目時，周不時帶住班香蕉、蘋果、橙天使女去蘭桂坊夜蒲，佢最近索性搞部叫《喜愛夜蒲》嘅新戲，部戲噚日喺中環開鏡，除咗黃伊汶、楊愛瑾、陳靜（DaDa）、馬瑙、陳柏宇、萬寧哥哥同組合Square現身之外，仲有大班見到個樣都諗唔起個名、但個個着晒低胸衫嘅女仔。
有床上戲
導演錢國偉話部戲好似十幾年前部《晚九朝五》，但唔會三級，會將肉感變做性感。論資排輩，黃伊汶對住班新女即刻變咗老前輩，所以導演就安排咗個酒吧老闆娘角色畀佢，無謂同班新女鬥性感。騷身材梗係由班肯搏嘅後生女嚟，DaDa就有床上戲，不過對手唔係前男友、Square成員Gary。
當年DaDa同Gary未夠18歲就拍拖，不過拍咗無耐就分手，DaDa噚日見番舊拖友一啲都冇尷尬，仲爆話之前試過翻兜，但兜完唔得，想試吓新嘢，所以唔想喺戲中都同Gary做情人。DaDa有床戲，Gary都可能會露股，問Gary個股靚唔靚？佢竟然話問DaDa就知，DaDa即刻大笑話：「將個問題轉畀我咁蠱惑，見仁見智，都OK啦！」