教育局要求中學減班搞到滿城風雨，傳統名校啲校友特別緊張，其中申請減班嘅九龍華仁，校長陳岡指校友干預校政，校監周守仁更話自己遭「欺凌」，與為母校籌款搞小班教學嘅「華仁一家基金會」似乎勢成水火，事件最近有戲劇性發展，有校友捐出500萬元畀基金會，而基金會噚日同校方開會，基金會同意下學年捐款500萬元畀學校，點解忽然和氣收場，耐人尋味。
自九華校監、校長反擊基金會後，校方更另起爐灶搞「無條件愛華仁」籌款運動，在幾乎家不成家邊緣，校友與校方以和為貴，知情人士指係因為大家都重視團結，爭持不下對任何人都冇好處，因此決定前事不提，重新出發。
減班風波傷和氣
是否真係可以冰釋前嫌，現時好難講，有九華舊生指，校方繼續搞「無條件愛華仁」籌款活動，顯然係擺出唔想妥協姿態；基金會消息則話，校方有權搞任何籌款活動，基金會無權干涉，「佢哋要自己籌款，同我哋無關」。
華仁一家基金會籌款目標1億元，連同上述最新一筆500萬元捐款，累積籌款數字已達9,000萬元，目標在望，本應好高興，突然鬧出減班風波而傷和氣，真係幾無癮。
其他傳統名校近日都因減班而多風雨，英皇校友要求教育局局長孫公下台，又揚言提出司法覆核要與政府打官司，一旦成事，應該係香港教育歷史性事件。皇仁校友亦為咗母校減班而好有意見，校友各自埋堆介入事件，有校友同八方講，減班爭議開始政治化，事關今、明兩年都係選舉年，校友圈子已有人質疑是否有人想藉此曝光，相信好戲陸續有來。
mailto:[email protected]