花旗股市前晚反彈，噚日亞洲股市亦借勢造好。日股雖然都彈，但核危機未解決，好難大升，喺現水平企得穩已經係萬幸。核危機會逐步驅趕資金由日本流走，主要金融市場在資金流向方面會有不同程度嘅得益。
港股反彈375點，報收23896，重越20日線，復活節假後又屆期指結算，恒指要升破24000關有啲難度，指數暫時料會喺23700至24100上落。
銀娛C輪28670：銀河娛樂（027）收13.82元，升5.9%。股價喺2月底由低位回升，累積升幅雖然唔細，但技術走勢仍然好強，噚日嘅升勢仲有大成交支持，睇個勢會推向16元，可以諗吓隻C輪28670。
隻輪現價21.2仙，2011年8月15日到期，行使價13.10元，溢價10.1%，引伸波幅56.8%，槓桿率6.5倍（有效4.1倍），正股升上16元，28670有機會見36.8仙，升幅超過7成，正股跌穿13元就沽咗隻輪。
俊樺