特種部隊係男性專利？PS3新作《SOCOM4：U.S.NavySEALs》就一反呢個傳統，首次加入代號「45」韓籍特種女兵，佢槍刀雙絕、冧友手法粗暴，最重要係成Team人都要跟佢搵食，打得極火爆！
記者：許福合
廢話對白 勁出位
《SOCOM4》中，玩家會扮演五人北約部隊指揮官，接到任務要去阻止反政府部隊及各種破壞活動；遊戲中會以英文對話，而且說話內容非常出位，值得留意吓！
行動組會由兩名西人及兩名韓國隊員組成，其中一個就係代號「45」嘅女隊員，遊戲中佢雖然無乜性感表現，不過外形非常Cool，見到背後捅一刀，感覺似係殺手多啲。45在遊戲中相當關鍵，例如在部份潛入任務，你可以切換成45，控制部隊前進，玩落會幾特別。
困難模式 見真章
遊戲任務幾多元化，例如要堅守陣地、抵擋敵人數波攻擊，同時更要躲避導彈，開打後會非常忙碌緊張。在玩一般難度時，會發現敵人AI設定比較遲鈍，再加上自己成員近乎不死，可以話毫無挑戰性。建議高手們至少要選困難模式，AI明顯聰明得多，下令之後，隊員都會自動自覺搵位攻擊，亦可對狙擊手指示射擊。當有隊員死亡，隊員會互相幫忙復活，不過若然玩家自己死亡，就會Gameover！
保護拆彈專家 勁難!
個人覺得《SOCOM4》精華，放在多人模式中，玩法包括小隊死亡競賽及常見嘅奪旗模式，不過最有趣係「拆彈」！小隊中會分配一名拆彈專家，佢會有強化保護裝備，小隊要保護拆彈隊員到三個不同地點，將炸彈拆除。聽落簡單，但護送途中，經常會受敵人攻擊，好多網友都話經常只玩到30秒，原因係個拆彈專家已經被人爆頭死咗！
《SOCOM4》整體遊戲性不俗，小隊指揮操控玩法相當過癮，可惜單人模式太短，高手不用一天就爆機，好在還有多人模式及支援Move操控，耐玩性仍算不俗。
Profile
主機：PS3
遊戲類型：射擊
遊戲人數：1-32人
廠商：SCEA
網站： http://www.socom.com/
