四叔李兆基恨抱男孫，大公子家傑侍父至孝，不惜越洋搵代母生咗三胞胎，等四叔兩手抱住三個男孫過足癮。不過，四叔仍然希望新抱徐子淇可以為李家生返個慈菇椗。「千億新抱」徐子淇不負所望，再度懷孕，據四叔親家徐傳順身邊友人講，徐生有日好高興咁話，「子淇呢次終於完成使命！」
李兆基下周一北上
雖然徐傳順唔肯親口講今次係抱男外孫，仲話點知超聲波會唔會搞錯，但據聞，原本已經好笑容嘅徐生，講呢個消息嗰陣，開心到不得了。慈菇椗將會喺7月頭出世，認真恭喜。
講返四叔，佢老人家日理萬機，除咗湊孫同等孫仔出世，就嚟仲要出trip返大陸。噚日喺香港做緊大連生態科技創新城招商嘅大連市副市長曲曉飛，爆料話見過恒地（012）管理層，仲敲定四叔會喺25號去大連參加一個重要儀式，之後仲會去佢個科技創新城考察。恒地旗下嘅名氣通，已經投資咗2000萬美金喺科技創新城，搞咗個1.6萬平方米嘅數據中心。
華華仲八到，四叔其實會先上北京巡視業務，仲會到訪清華大學，話唔定呢幾日大家會聽到佢親口證實再抱男孫呢。
李華華
mailto:[email protected]