復活節連放四日假期，最好就是與小朋友做一些親子甜品，嫌朱古力蛋無新意？不如跟Denice做百變復活蛋，有水牛蛋、肉丸蛋、酥皮蛋，仲有將曲奇做到打開的蛋殼，以忌廉及芒果雪糕分別扮蛋白和蛋黃，十足十分子料理，夠晒特別！
記者：趙珮倩
攝影：楊錦文
鳴謝：加州葡萄乾管理委員會
V壹網：http://www.vdonext.com/index.php?fuseaction=Features.Archive&channel_id=575603&program_id=1655373
睇片即上
留言電郵：mailto:[email protected]
今日煮腦
DeniceWai（6Senses創辦人）
自小向任職廚師的爸爸偷師，嚐過各國美食並融入個人的烹調風格中，由中菜到意大利菜都拿手。
煮題 親子百變復活蛋
有料到
水牛芝士 先隔水後炸
水份較多，宜先用紗布袋將水牛芝士包起，隔去多餘水份，炸時便不會彈油。
加州提子乾 補充體能
含豐富膳食纖維、葡萄糖、蛋白質、維他命、鐵質及鉀質，其天然果糖成份，能為身體快速補充體能。
牛油 軟化混合食材
從雪櫃取出後，宜在室溫放上約10至15分鐘，使它有足夠時間軟化，才可均勻地混合其他材料。
呍呢拿油 少許增香味
做曲奇加入呍呢拿油，可增加香味，但落少許便足夠，否則會有苦澀味。
酥皮 急凍夠方便
酥皮製作需時繁複，建議可於超市買急凍酥皮，解凍後便可用，十分方便。
蛋殼雪糕提子曲奇
蛋形焗模很難買到，所以Denice在細碗內鋪上錫紙，再塗上少許牛油，動動腦筋，焗模都可以DIY。
材料
牛油（室溫）115克、糖42克、雞蛋1隻、麪粉105克、糖漿/呍呢拿油各半湯匙、加州金葡萄乾2湯匙、鮮忌廉（已打企身）/芒果雪糕各適量、溶牛油少許
做法
1.糖、牛油用攪拌機打至鬆身，加雞蛋、呍呢拿油、糖漿打勻。
2.拌入麪粉繼續打勻成麪糰，取出，用保鮮紙包起放入雪櫃，雪30分鐘至略硬身。
3.將麪糰碾平，切四份，放上圓碗，沿邊成圓皮。
4.將錫紙包着整隻碗，塗上溶牛油，再鋪上圓皮，壓實，切花邊，再壓上提子乾。
5.將碗倒轉放在鐵架上，放入預熱至170℃焗爐中，焗15分鐘。
6.取出待凉10分鐘，輕輕撕去錫紙，脫出殼蛋曲奇。
7.將蛋殼曲奇上碟，旁邊放上雪糕，並圍邊唧上忌廉，做成打開的雞蛋。
提子肉丸球
提子肉丸球外形做到似賓尼兔，十分有復活節Feel，小朋友一定鍾意。
材料
牛肉碎/豬肉碎各140克、洋葱粒60克、蒜茸2茶匙、奶150毫升、薯茸250克、蛋2隻、番荽碎3湯匙、鹽/胡椒粉各1湯匙、粟粉2湯匙、加州提子乾250克
汁料：雞湯/奶各80毫升、水125毫升、牛油35克、老抽2茶匙、麪粉3湯匙
做法
1.開大火燒熱鑊下油，加入洋葱粒、1茶匙鹽炒至軟身，盛起攤凉。
2.豬肉碎、牛肉碎、蛋、蒜茸、番荽碎、提子乾、餘下的鹽、粟粉、薯茸、胡椒粉、奶及洋葱拌勻成肉料。
3.將肉料用匙羮舀成蛋形。
4.開中火落油起鑊，將肉丸煎至金黃及全熟盛起備用。
5.開細火以白鑊將牛油煮溶，下麪粉、雞湯煮勻，再倒入奶、水、老抽慢慢煮至稠身。
6.將肉丸上碟，以汁料畫成免耳朵即成。
貼士
煎肉丸時怕表面燶，但入面未熟，可以在煎時加4杯熱水，冚蓋煮5分鐘便可。
酥皮蛋
用了蓮蓉做餡，做法有點似中式甜品，加上造型可讓小朋友隨意發揮畫上花紋圖案，是一個很好的復活節親子活動。
材料
酥皮1塊、蓮蓉125克、加州提子乾170克、食物色素（綠、黃、紅、橙）各少許、麪粉/蛋漿各適量
做法
1.將150克加州提子乾加入蓮蓉搓勻成餡料。
2.砧板上撒上麪粉，放上酥皮，再撒上麪粉，切出4個橢圓蛋形的酥皮。
3.將適量的餡料放在一塊酥皮，蓋上另一酥皮，掃上蛋漿。
4.酥皮上以食物色素畫上花紋圖案。
5.將酥皮放入預熱至180℃焗爐中，焗10-12分鐘，取後後撒上餘下的提子乾即成。
貼士
復活蛋顏色要色彩繽紛，不要用太深色食物色素，否則焗出來效果不理想。
炸水牛芝士蛋
只要將水牛芝士及加州提子乾拌勻，然後炸成黃金形即可，做法簡單，味道十分搭調。
材料
水牛芝士125克、加州提子乾/蛋漿各2湯匙、洋葱碎/麪粉各1湯匙
做法
1.用紗布袋將水牛芝士隔去多餘水份。
2.將水牛芝士略搓，加入洋葱碎、提子乾拌勻並搓爛，用匙羮舀出橢圓形狀成芝士蛋。
3.將芝士蛋沾上麪粉，再蘸上蛋漿。
4.開中火，燒熱油至70℃，下芝士蛋炸至金黃色即撈起，瀝油後上碟。
貼士
水牛芝士必須略搓爛，才加其他材料混合，否則芝士蛋炸時會散開。