富士康（2038）發生員工「連環跳」事件後，俾全世界標籤為血汗工廠，可想而知，打台灣富商郭台銘嘅工，壓力唔輕。其實做人應該正面啲，放工盡量放鬆心情，紓緩壓力。不過，減壓都有好多方法，同好睇環境嘅。
色情場所包圍總部
新一期《台灣壹週刊》爆料，話富士康母公司鴻海集團，喺台灣新北市土城嘅總部附近，原來春色無邊，俾各式各樣色情場所包圍。根據喺色情場所返工嘅越南佳麗講，佢哋嘅客主要係土城工業區裏面嘅上班族。其中，由於鴻海薪酬高，所以唔少工程師收工之後，會開十分鐘車出嚟「紓壓」，之後先至返屋企。
唔知一向關懷員工嘅老闆郭台銘，睇完篇報道後，會唔會召開員工大會，教育吓班工程師呢又。