英雄莫問出處，衣錦榮歸卻係另一回事。聲明無意再做局長嘅馬時亨接受有線電視節目訪問，重回細個時住嘅北角書局街美輪大廈，肥馬指大廈幾十年不變，話以前一家六口住百幾呎板間房，同鄰居共用廚、廁。
肥馬父親早逝，佢媽媽做工廠女工擔起頭家，身為大仔嘅肥馬要買餸煮飯兼照顧兩弟一妹，佢話當時好窮，平日豬油撈飯，大時大節都係加隻蛋，佢更要幫手挑褲腳幫補家計。藝人曾志偉父親曾啟榮係肥馬舅父，肥馬視佢為大恩人眾所周知，「舅父對我影響好大，如果冇舅父支持，我中學畢業後就要出嚟打工，冇得升大學」。
肥馬又自爆感情史，原來佢同太太讀預科時已認識，又係港大同學，但一直無feel，直至兩人後來喺加拿大重遇先撻着，肥馬稱太太嫌佢讀大學時老土，睇佢唔上眼。