中環人長年幫襯嘅Jimmy'sKitchen係中國老牌西餐廳，1924年喺上海開張，1928年擴充到香港；1948年大陸變色前，上海占美關閉；事隔幾十年，占美終於「海歸」，上海占美新舖喺前老錦江賓館，今個月28號開張。
香港占美廚房嘅客人，到上海時唔知有冇興趣光顧逾80年歷史「老店」。八方聽聞上海占美開張當日訂枱已經幾full，為咗滿足食客懷舊心情，上海占美裝修以木為主，配合壁燈、真皮凳、硬木地板，舊上海feel爆燈。
八方幫襯餐廳最憎「食裝修」同等位，最緊要食物好味，占美廚房經典嘅啤酒炸魚薯條、基輔雞等招牌菜，喺上海食有冇香港嘅質素，八方未試過暫不能置評。上海占美會沿用香港menu，龍蝦濃湯、自家燻製三文魚、烤羊腿、乾馬德拉斯咖喱等俱全，令人嘩嘩聲嘅甜品火燄雪山，都有。