今年3月初，喺北京開兩會期間，主動向傳媒報喜，即將榮升爹哋嘅李國寶次子、東亞銀行（023）副行政總裁李民斌（Brian），原來上個月中，已經為寶哥哥帶嚟首名男孫，亦為「李家皇朝」正式展開「光宗耀祖」嘅新一頁歲月。
阿爺嗰代起「作福國民」起名
此話何解？華華聽聞，Brian快將滿月嘅乖仔，取名李光恆。李氏家族可以算得上係香港真正望族，成員繁衍，跨越政經法律界，宗族亦習慣同一輩份嘅男丁，起名首字統一，而且意義深遠。根據資深傳媒人秦家聰撰寫嘅《LiDynasty》（李家皇朝）一書，寶哥哥自阿爺嗰代計起，對落四代嘅家族成員名字，均以「作福國民」起名，至於下四代就係「光宗耀祖」。
所以Brian乖仔光恆，中文名首個字，跟隨李家族譜未來四代以「光宗耀祖」字輩起名。寶哥哥上一代嘅叔父輩，包括前上訴庭法官李福善、股壇教父李福兆等，就係福字輩嘅代表。寶哥哥堂弟、退休無幾耐嘅前終審法院首席法官李國能，同李國寶乃國字輩代言人。
至於小寶寶英文名叫JonathanDavid，跟伯父李民橋同爸爸Brian一樣，英文名嘅middlename，都承襲咗爺爺李國寶嘅英文名David，即係AdrianDavid同BrianDavid。
人逢喜事精神爽，噚日適逢東亞股東大會，華華問寶哥哥，再度榮升爺爺（李民橋與前妻羅寶盈育有女兒Adrinne），5月又將做老爺（傳聞李民橋5月與女友BonnieKwong獅城拉埋天窗），心情如何？四萬咁口嘅寶哥哥話，心情梗係好啦！
李華華
mailto:[email protected]
